រញ្ជួយដីកម្រិត ៧.៤ រ៉ិចទ័រនៅឥណ្ឌូនេស៊ី សម្លាប់មនុស្សម្នាក់ ខណៈការព្រមានអំពីរលកយក្សស៊ូណាមិត្រូវបានលុបចោល

 រញ្ជួយដីកម្រិត ៧.៤ រ៉ិចទ័រនៅឥណ្ឌូនេស៊ី សម្លាប់មនុស្សម្នាក់ ខណៈការព្រមានអំពីរលកយក្សស៊ូណាមិត្រូវបានលុបចោល

ហ្សាការតា៖ គ្រោះរញ្ជួយដីដ៏ធំមួយកម្រិត ៧.៤ រ៉ិចទ័របានវាយប្រហារឆ្នេរសមុទ្រភាគខាងកើតប្រទេសឥណ្ឌូនេស៊ីនៅថ្ងៃព្រហស្បតិ៍ ទី០២ ខែមេសា ដោយបានសម្លាប់មនុស្សម្នាក់ បណ្តាលឱ្យមានរលកយក្សស៊ូណាមិកម្ពស់រហូតដល់ ៧៥ សង់ទីម៉ែត្រ និងបង្កឱ្យមានការព្រមានពីរលកយក្សស៊ូណាមិ ដែលក្រោយមកត្រូវបានលុបចោល។

ទីភ្នាក់ងារស្ទង់ភូមិសាស្ត្រសហរដ្ឋអាមេរិក (USGS) បាននិយាយថា ការរញ្ជួយដីនេះបានវាយប្រហារនៅជម្រៅ ៣៥ គីឡូម៉ែត្រនៅក្នុងសមុទ្រ Molucca រវាងក្រុមកោះ Sulawesi និង Maluku នៅព្រឹកព្រលឹម។មជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក (PTWC) ដែលមានមូលដ្ឋាននៅហាវ៉ៃដំបូងឡើយបាននិយាយថា រលកយក្សស៊ូណាមិដ៏គ្រោះថ្នាក់អាចកើតមានក្នុងរង្វង់ 1,000 គីឡូម៉ែត្រពីចំណុចកណ្តាលនៃរញ្ជួយដីតាមបណ្តោយឆ្នេរសមុទ្រនៃប្រទេសឥណ្ឌូនេស៊ី ហ្វីលីពីន និងម៉ាឡេស៊ី។

យោងតាមទីភ្នាក់ងារភូគព្ភសាស្ត្រ BMKG របស់ប្រទេសឥណ្ឌូនេស៊ី ក្នុងរយៈពេលកន្លះម៉ោងនៃការរញ្ជួយដី រលកដែលមានកម្ពស់រហូតដល់ 75 សង់ទីម៉ែត្រត្រូវបានកត់ត្រានៅភាគខាងជើងនៃទីក្រុង Minahasa និង 20 សង់ទីម៉ែត្រនៅ Bitung ដែលទាំងពីរនៅភាគខាងជើងនៃកោះ Sulawesi។មជ្ឈមណ្ឌលរញ្ជួយដីនៅប្រទេសហ្វីលីពីន និងម៉ាឡេស៊ី ក៏មិនទាន់បានចេញការព្រមានអំពីរលកយក្សស៊ូណាមិដែរ។

ប្រទេសឥណ្ឌូនេស៊ី និងប្រទេសជិតខាងជួបប្រទះនឹងការរញ្ជួយដីជាញឹកញាប់ ដោយសារតែទីតាំងរបស់ពួកគេស្ថិតនៅក្នុង «ខ្សែក្រវាត់ភ្លើង» ប៉ាស៊ីហ្វិក ដែលជាខ្សែកោងនៃសកម្មភាពរញ្ជួយដីខ្លាំង ជាកន្លែងដែលបន្ទះតិចតូនិចប៉ះទង្គិចគ្នា ដែលលាតសន្ធឹងពីប្រទេសជប៉ុន ឆ្លងកាត់អាស៊ីអាគ្នេយ៍ និងឆ្លងកាត់អាងប៉ាស៊ីហ្វិក។

ក្នុងឆ្នាំ ២០០៤ គ្រោះរញ្ជួយដីកម្រិត ៩.១ រ៉ិចទ័របានវាយប្រហារខេត្តអាឆេ ដែលបណ្តាលឱ្យមានរលកយក្សស៊ូណាមិ និងសម្លាប់មនុស្សជាង ១៧០.០០០ នាក់នៅក្នុងប្រទេសឥណ្ឌូនេស៊ី។

ប្រភព: CNA

កែសម្រួលដោយ: កញ្ញា ណាន សុខណែត