សហរដ្ឋអាមេរិកអនុម័តការលក់ប្រេងរបស់រុស្ស៊ីដែលជាប់គាំងជាបណ្ដោះអាសន្នទៅឱ្យឥណ្ឌា
វ៉ាស៊ីនតោន៖ រដ្ឋាភិបាលសហរដ្ឋអាមេរិក នៅថ្ងៃព្រហស្បតិ៍ ទី៥ ខែមីនា បានបន្ធូរបន្ថយទណ្ឌកម្មសេដ្ឋកិច្ចជាបណ្ដោះអាសន្នប្រឆាំងនឹងប្រទេសរុស្ស៊ី ដើម្បីអនុញ្ញាតឱ្យប្រេងរបស់រុស្ស៊ី ដែលជាប់គាំងនៅលើសមុទ្រ ត្រូវបានលក់ទៅឱ្យប្រទេសឥណ្ឌា។
ក្រសួងរតនាគារបានឱ្យដឹងនៅក្នុងសេចក្តីថ្លែងការណ៍មួយថា ការិយាល័យគ្រប់គ្រងទ្រព្យសម្បត្តិបរទេសរបស់ក្រសួងរតនាគារបានចេញអាជ្ញាប័ណ្ណទាក់ទងនឹងប្រទេសរុស្ស៊ី «ដែលអនុញ្ញាតឱ្យដឹកជញ្ជូន និងលក់ប្រេងឆៅ និងផលិតផលប្រេងកាតដែលមានប្រភពដើមពីសហព័ន្ធរុស្ស៊ី ដែលផ្ទុកនៅលើនាវាគិតត្រឹមថ្ងៃទី 5 ខែមីនា ឆ្នាំ 2026 ទៅកាន់ប្រទេសឥណ្ឌា»។
ប្រតិបត្តិការទាំងនោះ រួមទាំងប្រតិបត្តិការពីនាវាដែលត្រូវបានរារាំងដោយរបបទណ្ឌកម្មផ្សេងៗ ត្រូវបានអនុញ្ញាតរហូតដល់ចុងថ្ងៃទី 3 ខែមេសា ឆ្នាំ 2026។
លោក Scott Bessent រដ្ឋមន្ត្រីក្រសួងរតនាគារបានមានប្រសាសន៍ថា ការលើកលែងនេះត្រូវបានចេញ «ដើម្បីឱ្យប្រេងអាចបន្តហូរចូលទៅក្នុងទីផ្សារពិភពលោក»។
លោកបានបង្ហោះនៅលើគេហទំព័រ X ថា «វិធានការរយៈពេលខ្លីដោយចេតនានេះនឹងមិនផ្តល់អត្ថប្រយោជន៍ហិរញ្ញវត្ថុសំខាន់ៗដល់រដ្ឋាភិបាលរុស្ស៊ីទេ ព្រោះវាអនុញ្ញាតឲ្យធ្វើប្រតិបត្តិការពាក់ព័ន្ធនឹងប្រេងដែលជាប់គាំងនៅលើសមុទ្ររួចទៅហើយ»។
លោកបានបន្ថែមថា ការលក់ទៅឱ្យប្រទេសឥណ្ឌានឹង «បន្ធូរបន្ថយសម្ពាធដែលបណ្តាលមកពី ការប៉ុនប៉ងរបស់អ៊ីរ៉ង់ក្នុងការចាប់ជាចំណាប់ខ្មាំងថាមពលពិភពលោក » ទោះបីជាប្រទេសឥណ្ឌាបាននិយាយថា ខ្លួននឹងឈប់ទិញប្រេងរបស់រុស្ស៊ីជាផ្នែកមួយនៃកិច្ចព្រមព្រៀងពាណិជ្ជកម្មជាមួយសហរដ្ឋអាមេរិកក៏ដោយ។
នៅក្នុងកិច្ចខិតខំប្រឹងប្រែងដ៏កម្រមួយ ដើម្បីដាក់សម្ពាធលើប្រទេសរុស្ស៊ី ជុំវិញការឈ្លានពានរបស់ខ្លួននៅអ៊ុយក្រែន ប្រធានាធិបតីអាមេរិក លោក ដូណាល់ ត្រាំ បានដាក់ទណ្ឌកម្ម លើក្រុមហ៊ុនប្រេងធំៗរបស់រុស្ស៊ី គឺក្រុមហ៊ុន Lukoil និង Rosneft កាលពីខែវិច្ឆិកា ឆ្នាំមុន។
ចលនាទាំងនោះ ដែលជាចលនាដ៏មានឥទ្ធិពលបំផុតរបស់លោក Trump ប្រឆាំងនឹងប្រទេសរុស្ស៊ីជុំវិញសង្គ្រាមអ៊ុយក្រែន បានធ្វើឱ្យអ្នកទិញប្រេងសំខាន់ៗរបស់រុស្ស៊ីប្រញាប់ប្រញាល់ស្វែងរកអ្នកផ្គត់ផ្គង់ជំនួស។
រុស្ស៊ីត្រូវបានគេរាយការណ៍ថាបានសាងសង់កងនាវាដឹកប្រេងចាស់ៗដែលមានកម្មសិទ្ធិមិនច្បាស់លាស់ដើម្បីគេចពីទណ្ឌកម្មដែលដាក់ដោយទីក្រុងវ៉ាស៊ីនតោន សហភាពអឺរ៉ុប និងក្រុមប្រទេស G7 ជុំវិញការឈ្លានពានទាំងស្រុងរបស់ទីក្រុងមូស្គូលើប្រទេសអ៊ុយក្រែនក្នុងឆ្នាំ 2022។
ប្រភព:CNA
កែសម្រួលដោយ: កញ្ញា ជា ស្រីពៅ