អាមេរិកបាញ់ពន្លិចនាវាចម្បាំងអ៊ីរ៉ង់នៅជិតប្រទេសស្រីលង្កា ខណៈណាតូបាញ់ទម្លាក់មីស៊ីលអ៊ីរ៉ង់ដែលកំពុងឆ្ពោះទៅប្រទេសទួរគី
ឌូបៃ៖ ជម្លោះរវាងសហរដ្ឋអាមេរិក និងអ៊ីស្រាអែល ជាមួយអ៊ីរ៉ង់ កាន់តែ រីករាលដាលយ៉ាងខ្លាំង នៅថ្ងៃពុធ ទី៤ ខែមីនា បន្ទាប់ពីនាវាមុជទឹកអាមេរិកមួយគ្រឿង បានលិចនាវាចម្បាំងអ៊ីរ៉ង់មួយគ្រឿង នៅឯនាយសមុទ្រស្រីលង្កា ដោយបានសម្លាប់មនុស្សយ៉ាងហោចណាស់ ៨០នាក់ ហើយប្រព័ន្ធការពារដែនអាកាសរបស់ណាតូ បានបំផ្លាញមីស៊ីលផ្លោងរបស់អ៊ីរ៉ង់មួយគ្រាប់ ដែលបាញ់ឆ្ពោះទៅប្រទេសទួរគី។
ការកើនឡើងនៃភាពតានតឹងនេះបានកើតឡើង នៅពេលដែលកូនប្រុសដ៏មានឥទ្ធិពលរបស់មេដឹកនាំកំពូលអ៊ីរ៉ង់ ដែលត្រូវបានសម្លាប់ បានលេចចេញជាអ្នកនាំមុខគេ ដើម្បីស្នងតំណែងពីគាត់ ដោយបានបង្ហាញថា ទីក្រុងតេអេរ៉ង់ នឹងមិនចុះចូលនឹងសម្ពាធនោះទេ ប្រាំថ្ងៃបន្ទាប់ពីសហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការយោធាមួយ ដែលបានសម្លាប់មនុស្សរាប់រយនាក់ និងបានធ្វើឱ្យទីផ្សារពិភពលោករង្គោះរង្គើ។
ឧប្បត្តិហេតុមីស៊ីលនេះ គឺជាលើកដំបូងហើយ ដែលប្រទេសទួរគី ដែលមានព្រំប្រទល់ជាប់នឹងប្រទេសអ៊ីរ៉ង់ និងមានយោធាធំទីពីររបស់ណាតូ ត្រូវបានអូសទាញចូលទៅក្នុងជម្លោះនេះ ប៉ុន្តែរដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បាននិយាយថា គ្មានន័យណាមួយដែលថា វានឹងបង្កឱ្យមានឃ្លាការពាររួមរបស់សម្ព័ន្ធមិត្តអាត្លង់ទិកនោះទេ។
ជាសញ្ញាមួយនៃការពង្រីកវិសាលភាពនៃជម្លោះ លោក Hegseth បាននិយាយថា ការវាយប្រហារដោយនាវាមុជទឹករបស់សហរដ្ឋអាមេរិកបានវាយប្រហារនាវាអ៊ីរ៉ង់មួយគ្រឿងនៅឯនាយឆ្នេរសមុទ្រភាគខាងត្បូងរបស់ប្រទេសស្រីលង្កា ចម្ងាយរាប់ពាន់គីឡូម៉ែត្រពីឈូងសមុទ្រ ខណៈដែលការប្រយុទ្ធគ្នាបានធ្វើឱ្យការដឹកជញ្ជូនតាមសមុទ្រឆ្លងកាត់ច្រកសមុទ្រ Hormuz ជាប់គាំងអស់រយៈពេលប្រាំថ្ងៃមកហើយ ដោយបានបិទចរន្តប្រេង និងឧស្ម័នសំខាន់ៗនៅមជ្ឈិមបូព៌ា។ប្រធានាធិបតីអាមេរិក លោក ដូណាល់ ត្រាំ បានសន្យាថានឹង ផ្តល់ការធានារ៉ាប់រង និងនាវាអមដំណើរ សម្រាប់កប៉ាល់នាំចេញថាមពលពីតំបន់នេះ ដើម្បីទប់ស្កាត់ ការចំណាយ ដែលកើនឡើងខ្ពស់ ដោយ តម្លៃប្រេងនៅតែជាប់គាំង នៅថ្ងៃពុធ ដែលឈានដល់កម្រិតខ្ពស់បំផុតក្នុងរយៈពេលជាងមួយឆ្នាំ។
ប្រភព : CNA
កែសម្រួលដោយ : កញ្ញា ណាន សុខណែត