អ៊ីស្រាអែលប្រកាសពីរលកថ្មីនៃការវាយប្រហារ «ទ្រង់ទ្រាយធំ» លើទីក្រុងតេអេរ៉ង់ និងអាកាសយានដ្ឋានត្រូវបានវាយប្រហារ
តេអេរ៉ង់៖ អ៊ីស្រាអែលបានប្រកាសពីរលកថ្មីនៃការវាយប្រហារ «ទ្រង់ទ្រាយធំ» ទៅលើគោលដៅរដ្ឋាភិបាលនៅទីក្រុងតេអេរ៉ង់ នៅថ្ងៃសៅរ៍ ទី៧ ខែមីនា ខណៈដែលប្រធានាធិបតីអាមេរិក ដូណាល់ ត្រាំ បាននិយាយថា មានតែ ការចុះចាញ់ដោយគ្មានលក្ខខណ្ឌរបស់អ៊ីរ៉ង់ ប៉ុណ្ណោះ ទើបអាចបញ្ចប់សង្គ្រាមមជ្ឈិមបូព៌ាដែលកំពុងកើនឡើង។
ទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍ថា អាកាសយានដ្ឋាន Mehrabad ក្នុងទីក្រុង Tehran ត្រូវបានវាយប្រហារ ទោះបីជា មិនទាន់មានការអត្ថាធិប្បាយភ្លាមៗពីកងឆ្មាំបដិវត្តន៍អ៊ីរ៉ង់ក៏ដោយ។ទីបញ្ជាការកណ្តាលសហរដ្ឋអាមេរិក ដែលទទួលខុសត្រូវចំពោះកងកម្លាំងអាមេរិកនៅមជ្ឈិមបូព៌ា បាននិយាយថា គោលដៅអ៊ីរ៉ង់ជាង ៣.០០០ ត្រូវបានវាយប្រហារក្នុងរយៈពេលមួយសប្តាហ៍កន្លងមកនេះ រួមទាំងទីស្នាក់ការកណ្តាលកងឆ្មាំបដិវត្តន៍ មជ្ឈមណ្ឌលបញ្ជាការ និងត្រួតពិនិត្យ ប្រព័ន្ធការពារដែនអាកាស ទីតាំងមីស៊ីល នាវាចម្បាំងកងទ័ពជើងទឹក និងនាវាមុជទឹក។
ការវាយប្រហារជាថ្មីរបស់អ៊ីស្រាអែលលើទីក្រុងតេអេរ៉ង់ បានកើតឡើងមួយថ្ងៃបន្ទាប់ពីអ៊ីស្រាអែលបានបង្កើនការវាយប្រហារតាមអាកាសរបស់ខ្លួនលើប្រទេសលីបង់ ដោយវាយប្រហារតំបន់ជាយក្រុងភាគខាងត្បូងនៃទីក្រុងបេរូត ជាកន្លែងដែលក្រុមសកម្មប្រយុទ្ធហេសបូឡាដែលគាំទ្រដោយអ៊ីរ៉ង់គ្រប់គ្រង និងតំបន់បាអាល់ប៊ែកនៅភាគខាងកើត។
ទន្ទឹមនឹងនេះដែរ អ៊ីរ៉ង់បានបើកការវាយប្រហារលើអ៊ីស្រាអែល និងប្រទេសជិតខាងឈូងសមុទ្ររបស់ខ្លួន ដោយអារ៉ាប៊ីសាអូឌីតបាននិយាយថា ខ្លួនបានស្ទាក់ចាប់មីស៊ីលផ្លោងមួយគ្រាប់ដែលបានបាញ់ទៅលើមូលដ្ឋានទ័ពអាកាសព្រះអង្គម្ចាស់ស៊ុលតង់ នៅជិតទីក្រុងរីយ៉ាដ ដែលជាទីតាំងរបស់បុគ្គលិកយោធាអាមេរិក។
ប្រភព: CNA
កែសម្រួលដោយ: កញ្ញា ណាន សុខណែត